About Me

Breaking

الأربعاء، 28 يونيو 2017

جوجل تم تغريمها 48600000000 جنيه مصري .


بالآمس حصل حاجه اظن مينفعش تعدي من غير ما نكون مدركين لحجم الامر ، 

الي حصل ان المفوضيه الآوربيه حكمت على ( جوجل ) بغرامة قدرها ٢.٧ مليار دولار ، متخيل حجم الرقم ؟ يعني بالجنيه فهو الرقم ده 48600000000 جنيه ، وعلشان لو مش عارف تقرأ الرقم ومتلغبط في الاصفار ف الرقم د ٤٨ مليار و ٦٠٠ مليون جنيه ، (داخل علي تكلفة حفر السويس الجديدة تقريبا ) و وبيقولك ان في خلال ٩٠ يوم الغرامه ممكن تتضاعف ، 



طيب ليه يا اخوانا تغرموهم الرقم دا كله ؟ قتلوا حد مثلا ! طب نصبوا على حد ! 



لا ياعم بس بيقولك الحكايه كلها انك لو بحثت على محرك البحث بتاع جوجل على مثلا منتج جوجل بتعمله وفيه شركات منافسه لجوجل بتعمله ف جوجل بتظهرلك منتجاتها في الاول قبل منتجات المنافسين ، طب فين التهمه الي تجيب الغرامات دي كلها ؟ 

بيقولك ان دا منافي لقواعد الاتحاد الاوروبي ل مكافحة الاحتكار   ، نعم ؟ 

وبيقولك ان دا حرم الشركات التانيه من فرصة التنافس على اساس الموضوعية والابتكار ! لا جوجل كده غلطانه الحقيقه ،

ف بيقولك بقى والاهم من انه حرمت الشركات من المنافسه انها حرمت المستهلكين الاوروبيين من خيار حقيقي للخدمات والفوائد الكاملة بترشيح منتجات جوجل بس ، 
فعلشان كده غرموهم الرقم الي قرآته فوق ده ، ولو جوجل في خلال ٩٠ يوم محلتش القصه هيضاعفوا الغرامه ، طيب ياعم ياسر وانت بتقولنا الكلام دا ليه ؟ دا كلام كبار ملناش دعوه بيه ، 

لآ انا بس حبيت تشوف هما ازاي بيحافظوا على المنافسين وبيحافظوا المستهلكين وبيقفوا في وش اكبر عملاق بحث على وجه الكره الآرضيه ، 

بالمنسابه السعيده دي ، ممكن تفكر في عالمنا العربي كام مشروع ممكن تشتغل عليه وتتحرم فيه من منافسه شريفه ، دا اصلا بعض المشاريع حكر على جهات معينه ومينفعش حد يدخلها غيرهم ولو دخلت هينسفوك في السوق ، 

ومن فتره كنا علمنا شركه كده وسميناها دلتا للاستثمار والتنمية العقارية ، واشتغلنا عليها وربنا كرمنا وحققنا نجاح كويس ، في نفس الوقت طلع اكتر من ٥٠ شركه في نفس المنطقه بنفس الاسم وبعضهم بيستخدم نفس الديزاينز بتاعتنا الخاصه بالدعايا . 
يلا الحمد لله . 







ليست هناك تعليقات:

إرسال تعليق